Ҳиллари Клинтоннинг сайловолди штаби ва Миллий демократик қўмита амалдаги президент Дональд Трампнинг Россия билан алоқалари тўғрисида маълумотлар тўпланишини молиялаштирган. Бу ҳақда The Washington Post маълум қилди, дея хабар беради «Ведомости».
Ўрганишларни дастлаб Трамп республикачилар партиясидан номзод сифатида илгари сурилишига халақит бериш учун Вашингтондаги Fusion GPS политология фирмаси олиб борган ва Конгрессдаги номаълум республикачи бунга ҳомийлик қилинганди. Трамп номзод бўлишни уддалаганидан сўнг текширув фирманинг ўз қизиқишлари доирасида давом эттирилди.
2016 йил апрелида уни Клинтон сайловолди штаби вакили, Perkins Coie юридик фирмаси эгаси Марк Элиас қўллаб-қувватлашга қарор қилди. Молиялаштириш унинг фирмаси орқали амалга оширилди ва октябр охирига қадар давом этди. Бунинг учун қанча маблағ сарфлангани номаълум, бироқ газета Клинтон штаби 2015 йил июнидан 2016 йил декабригача Perkins Coie’га суд харажатлари учун 5,6 миллион, миллий қўмита эса юридик маслаҳатлар учун 3,6 миллион доллар тўлаганини билдирмоқда.
Трампнинг Россия билан алоқалари тўғрисидаги маълумотларни Fusion GPS ёллаган Британия махсус хизматлари собиқ агенти Кристофер Стил тўплади. Улар 11 январда, Трампнинг инаугурациясидан 9 кун аввал BuzzFeed нашри томонидан эълон қилинди.
Ҳозирда мазкур маълумотларни Сенатнинг разведка қўмитаси ўрганмоқда, аммо Стил сенаторлар олдида кўрсатма беришдан бош тортгани текширувни боши берк кўчага киритиб қўйди.
Изоҳ (0)