Испания бош вазири Мариано Рахойнинг маълум қилишича, Каталониянинг мухторият ҳуқуқлари чекланиши доирасида ҳудуд ҳукумати тарқатиб юборилади, парламенти қайтадан сайланади.
Вазирлар Маҳкамасининг 21 октябрдаги мажлисдан сўнг, Рахой ҳудуд маъмурияти ва парламенти ваколатлари Испания марказий ҳукуматига ўтказилишини эълон қилди, дея хабар бермоқда Meduza.
Испания ҳукумати мамлакат Конституциясининг 155-моддасини ҳаракатга келтириш доирасида шундай чораларни қўлламоқчи. Мазкур модда ҳудудий маъмуриятлар қонунни бузса ва бутун мамлакат манфаатларига зид ҳаракатлар қилса, уларнинг мухторият мақомини тўхтатиб қўйишга рухсат беради.
Каталонияда тартибни қайта тиклаш учун кейинги ярим йил давомида ҳудудий парламентга сайлов ўтказилади, шундан сўнг Каталониянинг янги ҳукумати тасдиқланади.
Испания ҳукуматининг Каталония маъмурияти ваколатларини чеклаш ҳақидаги илтимоси мамлакат Сенати томонидан 27 октябрь куни маъқулланиши ва эртасига кучга кириши кутилмоқда.
«Жаҳоннинг ҳеч бир мамлакати ўзида бу каби вазият — бир томонлама мустақиллик эълон қилиниши ҳолатига йўл қўймасди», — деди Рахой.
Каталонияда 1 октябрь куни мустақиллик референдуми бўлиб ўтди, унда иштирок этганларнинг аксарияти Испания таркибидан ажралиб чиқиш учун овоз берди.
Испания Конституциявий суди мазкур референдумни ноқонуний деб топган эди, расмий Мадрид эса овоз бериш жараёнида кўплаб қоидабузарликларга йўл қўйилганини қайд этди.
Референдумдан сўнг Каталония мустақиллик эълон қилиш-қилмаслик борасида аниқ бир позицияни эгаллашдан бош тортди. Бунинг ўрнига ҳудуд маъмурияти музокаралар бошлашни таклиф қилди.
Изоҳ (0)