Жанубий Корея ва АҚШнинг КХДР бўйича махсус вакиллари учрашувлари давомида барча манфаатдор томонларнинг Шимолий Корея ядро муаммоси бўйича ҳаракатларини мувофиқлаштириш ҳақида келишиб олди. Бу ҳақда Жанубий Корея ТИВ 20 октябрь, жума куни маълум қилди, дея хабар беради «Интерфакс».
«Ли До Хун ва Жозеф Юн Сеул—Вашингтон иттифоқи негизида асосий шериклар билан ҳамкорлик зарурлиги тўғрисида якдил фикрга келди. Хусусан, Хитой ва Россиядан амалий қадамлар қўйилишига эришиш учун ҳаракатларни фаоллаштириш хусусида келишиб олинди», — дейилади Жанубий Корея ТИВ хабарида.
Томонлар учрашув давомида Шимолий Корея ядро таҳдидига дипломатик воситалар, жумладан, санкциялар ва босим ўтказиш йўли билан қарши туриш йўлларини муҳокама қилди.
Кузатувчилар учрашув АҚШ президенти Дональд Трампнинг Жанубий Кореяга 7—8 ноябрга мўлжалланган ташрифи арафасида бўлиб ўтганига эътибор қаратди.
Изоҳ (0)