Хитой расмийлари партия аъзолари ва давлат хизматчиларига нисбатан порахўрлик ҳамда коррупциянинг бошқа турлари юзасидан 2,6 миллиондан ортиқ иш қўзғади. Бу ҳақда Хитой коммунистлар партиясининг интизомни текшириш бўйича марказий комиссияси котиби ўринбосари Ян Сяоду маълум қилди, дея хабар беради «ТАСС».
«Охирги 5 йил мобайнида 2,6 миллиондан ошиқ ишни ўргандик ва 1,5 миллиондан ортиқ кишини жазоладик. 58 мингга яқин айбланувчи суд олдида жавоб берди», — деди у.
Мансабдорга кўра, бу рақамлар партия ва давлат аппарати сафларида коррупцияга қарши фаол кураш олиб борилаётганидан далолат беради.
«Биз амалий услубларга таянамиз, хатолардан хулоса чиқарамиз ва уларни қайтармасликка ҳаракат қиламиз. Буни ‘бемор’, яъни жамиятни қутқаришга имкон берадиган профилактикага қиёслаш мумкин», — таъкидлади Ян Сяоду.
Изоҳ (0)