Тошкентда 17 октябрь куни кузатилган бўрон оқибатида Чилонзор туманида истиқомат қилувчи аёлнинг устига дарахт шохи синиб тушган. Бу ҳақда Ўзбекистон Фавқулодда вазиятлар вазирлиги матбуот хизмати хабар бермоқда.
«Ҳодиса оқибатида аёл турли даражада тан жароҳати олган ва шифохонага ётқизилган. Тиббий ёрдам кўрсатилишига қарамай, у шифохонада вафот этган», — дейилади вазирлик ахборотида.
Вазирликнинг қайд этишича, 17 октябрь куни Тошкент шаҳри ва Бухоро вилоятида шамол тезлиги сониясига 32 метргача кучайган. Оқибатда айрим маъмурий бинолар ва уйларнинг том қисмларига зарар етган.
Дарахт шохларининг синиб тушиши сабабли баъзи фуқароларнинг автотранспорт воситаларига шикаст етган, автомобиль йўлларида тирбандликлар юзага келган. Тошкентнинг айрим ҳудудларида электр линияларининг узилиши туфайли электр таъминотида вақтинчалик узилишлар бўлган.Хабар беришларича, маҳаллий бошқарув органлари, авария-қутқарув хизматлари томонидан юзага келган вазият оқибатларини бартараф этиш бўйича тезкор чоралар кўрилган.
Изоҳ (0)