Тошкент шаҳрида бўлиб ўтаётган қозоқ-ўзбек бизнес форуми доирасида Қозоғистоннинг Ўзбекистондаги элчиси Ерик Утембаев биргаликда иқтисодий зоналар яратиш зарурлигини таъкидлади, деб хабар берди «Казинформ».
Ерик Утембаев Қозоғистон савдо миссиясининг очириш маросимида сўзлаган нутқида форум иштирокчиларини икки мамлакат ўртасида иқтисодий алоқалар ривожланиб бораётгани билан батафсил таништирди, шунингдек, қўшма ҳамкорлик ва иқтисодий ҳудудларни яратиш йўли билан уларни мустаҳкамлашни таклиф қилди.
«Яқин вақтлар ичида биргаликда иқтисодий зоналарни яратиш устида иш бошлашимизни истардим. Бундай имкониялардан бири — чегара ҳудудлари билан ишлашдир. Яқиндагина Қозоғистон президентининг Ўзбекистонга ташрифи чоғида биз Ўзбекистоннинг барча чегара ҳудудлари билан шартнома туздик. Келгуси қадам биргаликда иқтисодий ва саноат зоналарини яратиш бўлиши керак. Бу жиҳатдан Ўзбекистон Республикаси катта тажрибага эга ва биз кейинги семинарда барча ҳудудий йўналишлар бўйича ишни бошлаб юборишимиз мумкин», — дея таъкидлади Ерик Утембаев.
Бундан ташқари Қозоғистон элчиси икки мамлакат раҳбарларининг товар айирбошлаш ҳажмини 5 миллиард долларга етказиш борасида қўйган вазифасини алоҳида таъкидлади.
«Икки давлат раҳбарлари томонидан қўйилган катта мақсад — келгуси йилда Қозоғистон ҳамда Ўзбекистон ўртасида минтақалараро биринчи катта форумни ўтказиш. Қозоғистоннинг ўн олти нафар ҳокими ва Ўзбекистоннинг ўн тўрт нафар ҳокими минтақалараро ҳамкорликни ривожлантириш бўйича аниқ чора-тадбирлар таклиф этиши мумкин бўлган бу турдаги форум ҳали икки мамлакат ўртасида ўтказилмаган».
Изоҳ (0)