Тошкент вилоят Бекобод тумани ҳокими Отабек Исроилов аҳоли билан юзма-юз учрашди. Ҳокимнинг аҳоли билан учрашувлари ҳақидаги махсус кўрсатув Ўзбекистон телевидениеси орқали намойиш этилди.
Ҳоким қабулида бўлган фуқаролардан бири — Анора Шамситдинова. У беш нафар фарзанднинг онаси. 2006 йилдан бери уй-жой масаласида туман ҳокимлигига мурожаат қилиб келади. Тинимсиз кўч-кўчлар оқибатида катта ўғли олти марта мактабини ўзгартирган. Иккинчи ўғли нисбатан оғир касаллик чалинган, уни даволаш учун пул керак.
Бир муддат аввал тумандаги намунавий уйлардан бирининг эгаси, кўп фарзандли бу оиланинг қийналиб кетганини кўриб, аёлнинг тўрт ўғли вояга етгунича яшаб туриш шарти билан хонадонидан тўрт сотих ер ажратиб берган. У ҳокимдан кичкина қурилиши учун тумандаги бузилган бинодан эски қурилиш материалларини беришни сўраган.
«Хўжайиним иккаламиз кун бўйи ишга чиқамиз, ҳар куни. Уйда ўтирмаймиз. Кичик фарзандимизни қўшнига ташлаб, ишга чиқамиз», — дейди Анора Шамситдинова.
Ҳоким аёлнинг мурожаатини тинглаб, ёрдамчисига оиланинг уйи учун захирадан камида 20 та шифер ажратиш ҳақида кўрсатма берди, туман соғлиқни сақлаш бошқармаси бошлиғига эса касалманд боланинг бир йиллик харажатини тайёрлаш ҳақида топшириқ берди. Шунингдек, қабулхонанинг ўзида аёлнинг фарзандлари учун кийим-кечак топширди.
Видеода мурожаатчи аёл туман ҳокимининг бу ғамхўрлигидан йиғлаб юборганини кўриш мумкин.
Изоҳ (0)