Жаҳонга машҳур Aspire футбол академиясининг ваколатхонаси Ўзбекистонда иш бошлайди. Бу ҳақда ЎФФ матбуот хизмати хабар берди.
Қатарда бўлиб турган ва расмий ташрифининг илк кунида Aspire футбол академияси билан яқиндан танишган ЎФФ президенти мамлакат расмийлари билан шу масалада келишиб олган. У Қатар амирлик оиласининг энг нуфузли вакилларидан бири, Қатар амири Шайх Тамим бин Ҳамад Ас-Сонийнинг акаси, бир вақтнинг ўзида амирнинг дипломатик масалалар ва спортни ривожлантириш бўйича бош маслаҳатчиси Шайх Жассим бин Ҳамад бин Халифа Ас-Соний билан учрашган.
ЎФФ замонавий талабларга жавоб берадиган футбол академияси очиш борасида Қатар билан ҳамкорлик қилишга тайёр эканини билдирди.Aspire
Доҳадаги Aspire спорт академиясига 2004 йил Қатар амирининг фармони билан асос солинган. Унинг бош мақсади Қатар спорти келажаги учун ёш иқтидорларни излаш, уларни академияга олиб келиб, шу ернинг ўзида таълим бериш ва катта спортчи қилиб тарбиялашдан иборат. Академиянинг «Иқтидорларни излаш дастури» мавжуд. Бунда улар Қатар Олимпия Қўмитаси ва Қатар Олий Таълими Кенгаши билан яқиндан ҳамкорлик қилади. Дастур мактаб ўқувчилари орасидан иқтидорли болаларни излаб топиб, уларга спорт бўйича грант дастурларда иштирок этишни таклиф қилади.
Академияга кучли хорижий менежерлар, мураббийлар ва экспертлар жалб қилинган. Футбол таълими стандартлари бўйича Aspire дунёнинг энг яхши академияларидан бири саналади. Жаҳон футболи афсоналаридан Пеле, Месси, Рауль, Хави кабилар академиянинг халқаро ареналардаги элчиси сифатида фаолият юритади.
Шайх Жассим 2004 йилдан буён Aspire академиясига раҳбарлик қилиб келади. Шу билан бир вақтда у 2022 йилги Жаҳон Чемпионатини ўтказиш бўйича ташкилий қўмитанинг вице-президенти ҳам ҳисобланади.
Изоҳ (0)