КХДР ядро қуролини тўлиқ тақиқлаш ғоясини қўллаб-қувватлайди, аммо АҚШнинг қўл остида ядро қуроли бўлар экан, у ҳам ўз арсеналини сақлаб қолмоқчи. Бу ҳақда Шимолий Кореянинг БМТдаги доимий вакили Ким Ин Рен маълум қилди, деб ёзади «РИА Новости». У ядро уруши «ҳар қандай лаҳзада бошланиши мумкин»лигини қўшиб қўйди.
Дипломатнинг сўзларига кўра, Пхеньянда ядро қуроли ва баллистик ракеталар борлиги «ўз-ўзини ҳимоя қилиш бўйича ўринли чора ҳисобланади». «Дунёдаги ҳеч бир мамлакат АҚШ томонидан бунчалик узоқ вақт давомида бунчалик кескин ва тўғридан-тўғри ядровий таҳдидга учрамаган эди», — дея таъкидлади КХДР вакили. «Бутун дунёнинг диққати қаратилган Корея ярим оролидаги вазият жиддий нуқтага етиб келди, ядро уруши ҳар қандай лаҳзада бошланиб қолиши мумкин», — дея қўшимча қилди у.
«АҚШ томонидан бўлаётган душманларча муносабат ва ядровий таҳдид тўлиқ бартараф этилмас экан, биз ядро қуролимиз ва баллистик ракеталаримиз бўйича ҳеч қанақа музокаралар олиб бормаймиз ва танлаган йўлимиздан бир дюйм ҳам чекинмаймиз», — дея ишонтирди дипломат.
Изоҳ (0)