Ўзбекистон делегациясининг ХВЖ ва Жаҳон банки бошқарувчилари кенгашлари йиғилишидаги иштироки доирасида Вашингтонда Европа инвестиция банки билан мазкур муассасанинг Ўзбекистондаги фаолияти тўғрисида келишув имзоланди. Бу ҳақда ТИВ матбуот хизмати хабар бермоқда.
Ҳужжат Ўзбекистон бош вазири ўринбосари Жамшид Қўчқоров ва ЕИБ вице-президенти Вазил Худок томонидан имзоланди.
«Европа иттифоқи Ўзбекистонда янада фаол бўлиши, одамлар иттифоқ охирги пайтларда бу ерда юз бераётган ижобий ўзгаришларни диққат билан кузатиб бораётганини ҳис этиши биз учун жуда муҳим. Мамлакатдаги янгиланишлар Ўзбекистон улкан салоҳиятга эга эканлиги ва Евросиёда катта рол ўйнашини кўрсатиб турибди», — деди Вазил Худок.
Келишувда ЕИБнинг Ўзбекистондаги фаолияти шартлари белгиланди. Банк ва у молиялаштирадиган лойиҳаларга мамлакатда тақдим этиладиган кафолатлар, имтиёзлар ва солиқ енгилликлари кўрсатиб ўтилган.
Мазкур ҳужжатнинг имзоланиши ЕИБ молиявий ресурсларидан Ўзбекистондаги йирик ижтимоий-инвестиция лойиҳаларини амалга оширишда фойдаланиш имконини бериши билдирилмоқда.
Изоҳ (0)