Ўзбекистон ҳукумати мамлакат Президенти Шавкат Мирзиёев хорижий сафарларга келиб чиқиши ўзбекистонлик бўлган россиялик миллиардер Алишер Усмоновнинг самолётида парвоз қилаётгани ҳақида хорижий ОАВларда берилган хабарларни тасдиқлади.
«Ўзбекистон ҳаво йўллари» миллий авиакомпанияси 14 октябрь куни мазкур ҳолат бўйича ахборот бериб, Алишер Усмоновнинг самолётидан фойдаланиш учун «амалдаги бозор нархлари бўйича тижорат шартларида» ижара шартномаси имзоланганини маълум қилди ва самолётни ижарга бергани учун Ўзбекистон ҳукумати номидан россиялик миллиардерга миннатдорчилик билдирди.
Ўзбекистон ҳукумати томонидан «Ўзбекистон ҳаво йўллари» миллий авиакомпаниясига узоқ масофаларга мўлжалланган парвозлар вақтида Ўзбекистон Президентининг расмий самолёти сифатида фойдаланиш учун ижарага олиш эҳтимоли билан бир неча самолёт излаш ва саралаш ҳақида топшириқ берилган эди.Хорижий ОАВларда Ўзбекистон Президенти Шавкат Мирзиёев дастлаб АҚШга, сўнг Россиянинг Сочи шаҳрига россиялик миллиардер Алишер Усмоновга тегишли, номи «Бурҳон» бўлган самолётда парвоз қилгани ҳақида хабарлар пайдо бўлган эди. Ўзбекистон ҳукумати бу хабарларга дастлаб муносабат билдирмаган эди.Қулайлик, хавфсизлик ва техник тайёргарлик нуқтаи назаридан GlobalJet оператори томонидан таклиф қилинган Airbus 340 M-IABU самолёти танланди. Миллий авиакомпания ҳаво кемасининг эгаси ҳисобланган Klaret Aviation Limited компанияси билан амалдаги бозор нархлари бўйича тижорат шартларида ижара шартномасини имзолади.
«Ўзбекистон ҳаво йўллари» миллий авиакомпанияси Ўзбекистон ҳукумати номидан жаноб Алишер Бурҳонович Усмоновга Airbus 340 M-IABU самолётини юқорида қайд этилган келишув асосида Ўзбекистон Президенти фойдаланиши учун ижарага беришга розилик билдиргани ва самолётни тезкорлик билан тақдим этгани учун миннатдорчилик билдиради.
«Ўзбекистон ҳаво йўллари» МАК ахборотидан
Бироқ Ўзбекистон телевидениеси ахборот дастурларида шу вақтгача анъанавий равишда намойиш этиб келинган давлат раҳбарининг хорижга жўнаб кетиши ва қайтиши вақтидаги самолётга чиқиш ва ундан тушиш лавҳаларининг кўрсатилмагани бу хабарларни билвосита тасдиқлаган эди.
«Ўзбекистон ҳаво йўллари»нинг ахборотида келишув бўйича миллиардер Алишер Усмоновнинг самолёти қачонгача Ўзбекистон Президенти учун расмий ҳаво кемаси вазифасини бажаришига аниқлик киритилмаган. Ўзбекистон Президенти учун янги «биринчи рақамли борт» сотиб олиниши режалаштирилган-режалаштирилмагани ҳақида ахборот йўқ.
Изоҳ (0)