Эрон президенти Ҳасан Руҳонийнинг маълум қилишича, агарда мамлакат манфаатлари поймол этиладиган бўлса, Эрон «ҳеч иккиланй шунга яраша жавоб қайтаради». Бу ҳақда Reuters’га таяниб, «Коммерсантъ» хабар берди.
Ҳасан Руҳоний АҚШ президенти Дональд Трампнинг Эрон—Америка муносабатларига нисбатан маълум қилган янги стратегиясини танқид қилди.
Президентнинг таъкидлашича, Эрон ракета ва қуроллардан фақатгина мудофаа мақсадида фойдаланади. «Бизнинг мақсадимиз доим ўзимизни ҳимоя қилиш бўлган. Ўзимизга керакли бўлган қуролларни ишлаб чиқаришни давом эттирамиз. Ва бугундан бошлаб ушбу қуролларни яратиш борасидаги саъй-ҳаракатларимизни икки баробар оширамиз», — деди Руҳоний.
Руҳонийнинг қайд этишича, битимнинг бошқа томонлари унга содиқ қолмоқда: «Бирорта президент БМТ томонидан қўллаб-қувватланган халқаро битимни бекор қила олмайди. Бу Эрон ва АҚШ ўртасидаги битим эмас. Жаҳоннинг етакчи давлатлари АҚШнинг ядровий битим борасидаги позициясига қарши чиқди ва Вашингтон янада кўпроқ изоляцияда қолди».
Шунингдек, Эрон раҳбари барча минтақалардаги можаролар ва инқирозлар ортида Қўшма Штатлар тургани борасида ҳам ўз фикрини билдирди. «Сизлар Эроннинг Форс кўрфази устидан учиб ўтаётган самолётини уриб туширганингизни унутиб қўйдингиз! Минтақадаги урушларни ўзингиз бошлаганингизни унутиб қўйдингиз! Афғонистон, Ироқ, Сурия ва бошқа мамлакат фуқароларини қандай аҳволга солганингизни унутиб қўйдингиз!», — деди Руҳоний.
Эроннинг Исломий инқилоб соқчилари корпусига нисбатан АҚШ томонидан жорий этилган санкцияларга изоҳ берар экан, Ҳасан Руҳоний «корпус минтақада террорчиликка қарши курашни ҳеч қачон тўхтатмаслигини» маълум қилди.
Изоҳ (0)