АҚШ президенти Дональд Трамп Американинг Эронга нисбатан янги стратегиясига бағишланган йиғилишда сўзга чиқди. Давлат раҳбари ўзининг нутқи аввалида Теҳроннинг Вашингтон ва унинг иттифоқдошларига хавфи борасида сўзлади. Бундан ташқари Трамп Эронни «Ал-Қоида» ва «Толибон»ни молиялаштиришда, шунингдек, 11 сентябрдаги терактдан сўнг, Усама бен Ладеннинг ўғлини яширишда айблади, деб хабар берди «Коммерсантъ».
Дональд Трамп Теҳрон билан имзоланган ядровий битимга изоҳ бераркан, уни яна бир бор «АҚШ томонидан қабул қилинган энг ёмон бир томонлама битим», деб атади. Америка президентининг сўзларига кўра, битим «Эрон диктатурасини санкциялардан озод этган ҳолда унга сиёсий ва иқтисодий таянч берувчи ҳадя». Трампнинг баҳолашича, Теҳрон томонидан олинган маблағ 100 миллион доллардан ортиқроқ.
Шу билан бирга Оқ уй Конгрессга ядровий дастурдан воз кечиш таклифини берадими ёки йўқ, бунга мамлакат раҳбари ойдинлик киритмади. Бироқ Америка президенти «бизнинг вазифамиз — Эрон ҳеч қачон ядровий қуролга эга бўлмаслигига кафолат бўлиш», дея маълум қилди.
Дональд Трампнинг айтишича, Теҳрон ядровий битимнинг «моҳиятига амал қилмаган». «Бизнинг ушбу битимдаги иштирокимизни мен президент сифатида исталган вақтда бекор қила оламан», — деди АҚШ президенти.
Аввалроқ, АҚШ Молия вазирлиги «молиявий террорчиликнинг олдин олиш мақсадида» Эронга нисбатан ўз санкцияларини кенгайтиргани ҳақида хабар берилганди.
Изоҳ (0)