АҚШ бошчилигидаги коалиция вакили Раққада ИШИД устидан тўлиқ ғалаба қозонилгани ҳақида гапиришга эрта эканлигини маълум қилди. Унинг сўзларига кўра, олдинда оғир жанглар турибди. Аввалроқ шаҳарнинг тўлиқ озод қилингани ҳақида Al Arabiya телеканали хабар берган эди, деб ёзмоқда «РБК».
Reuters’нинг хабар беришича, ИШИД ўзининг пойтахти деб атаган Раққада жанглар давом этмоқда. Коалиция вакили Райан Диллоннинг сўзларига кўра, сўнгги кунларда қарийб 100 нафар террорчи асирга олинган.
Шаҳарда жанглар давом этаётгани ҳақида ABC News телеканали ҳам хабар бермоқда. Шаҳарнинг катта қисми террорчилардан озод қилинган, бироқ баъзи туманларда ҳали ҳам кураш давом этмоқда. Хусусан, стадион ва Раққа шимолидаги туманлар террорчилар қўлида қолмоқда.
Раққа 2014 йилда террорчилар томонидан эгаллаб олинганидан буён ИШИДнинг пойтахти ҳисобланади. 2017 йилнинг июнь ойида АҚШ бошчилигидаги коалиция Раққани озод қилиш операциясини бошлаган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)