Пентагонда лаҳзали глобал зарба берувчи истиқболли мажмуалар ишлаб чиқилмоқда. Бу ҳақда Россия мудофаа вазирлиги вакили Александр Емилянов ракетага қарши мудофаа масалалари бўйича Россия-Хитой брифингида маълум қилди, деб ёзади «РБК».
«Ядро билан жиҳозланмаган тарзда, ушбу мажмуалар бугунги кунда стратегик ядро кучларига юкланган вазифаларни бажариши керак», — деди у.
Мудофаа вазирлиги вакили Америка ракетага қарши мудофаа тизимини муфассал таҳлил қилиб, у яқин келажакда «сифат жиҳатидан янги даражага» чиқишини айтди.
Вазирлик фикрича, 2022 йилга келиб, АҚШ мингдан ортиқ ракетага қарши қуролга эга бўлади, истиқболда эса уларнинг сони Россия қитъалараро ракеталаридаги жанговар блоклардан ҳам ошиб кетади.
Россия ҳарбий муассасаси маълумотларига кўра, айни пайтда АҚШ ракетага қарши мудофаасига 30 та GBI, 130 та «Стандарт-3» ракетага қарши қуроллари ва 150 та ракетага қарши мажмуалар жалб қилинган. Шу билан бирга, 60 га яқин ракетага қарши қуроллар Европага, 150 таси Осиё-Тинч океани минтақасига жойлаштирилган.
Изоҳ (0)