АҚШ рақиб ракеталарини 97 фоиз ҳолатларда йўқ қилишга қодир қуролга эга. АҚШ президенти Дональд Трамп бу ҳақда Fox News телеканалига берган интервьюсида маълум қилди, дея хабар беради «ТАСС».
«Сиз қуролли кучларимизга нима харид қилаётганимизга эътибор беринг. Биз қирувчи самолётлар ва ҳарбий жиҳозлар сотиб оляпмиз, дунёда энг яхши ҳарбий техникани яратдик. Бизда ракеталарни ҳавода 97 фоиз ҳолатларда уриб туширишга қодир ракеталар бор. Агар икки ракета учирилса, уларни ҳам уриб туширамиз», — таъкидлади АҚШ президенти КХДР ракета-ядро дастури ҳақидаги саволларга жавоб берар экан.
«Биз жуда кучлимиз. Қуролли кучларимизни шу пайтгача ҳеч ким менчалик кучайтирмаган, биз 800 миллиард долларга яқинмиз», — деди Трамп АҚШ мудофаа вазирлигига 2018-молиявий йил учун ажратилган маблағни назарда тутар экан.
АҚШ сенати сентябрда Пентагонга 2018 йил учун 700 миллиард ажратиш ҳақидаги қонун лойиҳасини қабул қилди.
Бундан 640 миллиард доллар қурол-яроғ сотиб олиш, ҳарбийларга маош тўлаш ва қўшинлар жанговар тайёргарлигини сақлаб туриш учун ажратилди. 60 миллиард доллар хорижда, жумладан, Сурия, Ироқ, Афғонистон ва бошқа мамлакатларда операцияларни давом эттиришга мўлжалланган.
Изоҳ (0)