Ўзбекистон раҳбари президент Сердар Бердимуҳамедов таклифига биноан амалий ташриф билан Туркманистонга борди. Бу ҳақда 4 август куни Президент матбуот хизмати хабар берди.
Маълум қилинишича, Шавкат Мирзиёевни Туркманбоши шаҳри аэропортида туркман халқининг миллий етакчиси, Халқ маслаҳати раиси Гурбангули Бердимуҳамедов кутиб олган.
“Ўзбекистон етакчиси 5 август куни БМТнинг денгизга чиқиш имкони бўлмаган ривожланаётган мамлакатлар бўйича учинчи конференциясида, Марказий Осиё давлатлари раҳбарларининг еттинчи Маслаҳат учрашувига тайёргарлик кўриш масалаларига бағишланган махсус тадбирда иштирок этади ҳамда қатор икки томонлама музокаралар ўтказади”, дея хабар қилган манба.
“Аваза” миллий сайёҳлик зонасида бўлиб ўтадиган тадбирда БМТ бош котиби Антониу Гутерриш, хорижий давлатлар ва ҳукуматлар, халқаро ва минтақавий ташкилотлар раҳбарлари қатнашади.
Конференция кун тартибидан транспорт жиҳатидан ўзаро боғлиқликни мустаҳкамлаш ва савдо тартиб-таомилларини соддалаштириш, иқтисодий трансформация, иқлим ўзгариши ва атроф-муҳит учун хатарларга бардошликни ошириш, Барқарор ривожланиш мақсадларини рўёбга чиқаришда халқаро ҳамкорликни ривожлантиришнинг долзарб масалалари ўрин олган. “Аваза” сиёсий декларацияси ва ҳаракатлар дастурининг қабул қилиниши кўзда тутилган.
Эслатиб ўтамиз, Шавкат Мирзиёев 2024 йил октябрь ойида амалий ташриф билан Туркманистонга ташриф буюрган эди. Сафар давомида президент туркман шоири ва мутафаккири Махтумқули Фироғий таваллудининг 300 йиллигига бағишланган “Замон ва цивилизацияларнинг ўзаро боғлиқлиги – тинчлик ва тараққиёт асоси” халқаро форумининг ялпи мажлисида нутқ сўзлаганди.
Изоҳ (0)