Facebook ижтимоий тармоғининг кўплаб гуруҳларида жорий йилнинг июлида Сергели туманида бир қизга пичоқ орқали жароҳат етказган эркакка нисбатан «уч йилга озодликдан чеклаш» жазоси қўлланилгани кенг муҳокама қилинмоқда, деб хабар берди «Новости Узбекистана».
Шубҳали аккаунт томонидан жиноятчи жуда ҳам енгил жазо олгани ҳақида қолдирилган пост ижтимоий тармоқ бўйлаб яшин тезлигида тарқалди. Пост муаллифи ушбу хабарни кенг тарқалишига ва қандайдир чоралар кўрилишида ёрдам сўраган.
«Жабрланувчининг номидан. Салом, 27 июлда Сергели туманида бир қизга пичоқ орқали етказилган жароҳат воқеасини эсласангиз керак. Тасаввур қилинг, ушбу ижтимоий хавфли одамга 3 йил уй қамоғи тайинлашибди, яъни унга умуман жазо беришмабди!.. Айни вақтда у ҳаётимга таҳдид солмоқда. Ҳукуматимиз қаерга қараяпти?! У барча учун хавфли! Мен адолат истайман! Хабарда максимал даражада тарқатишга ёрдам беринг! Мени эътиборсиз қолдирманг. У бундан олдин ҳам шу турдаги модда билан судланган, бу ишни шундай қолдириб бўладими ахир?!», — дейилади хабарда.
Изоҳ қолдирувчиларнинг асосий қисми ўзини қизиққон тутган — бир қисми бу каби жазо тайинлаган судьяни айблаган бўлса, қолганлари Сергели ИИББ терговчисини порахўрликда қоралаган. Айримлар ҳатто петиция ёзишга ҳам чақирган.
Тошкент шаҳар ИИББ ушбу воқеага эътибор қаратди. Иш қайтадан кўтарилди, барча материаллар диққат билан ўрганиб чиқилди ва юқоридаги пост ўз ходимлари номида ёғдирилган мутлақ туҳмат деган хулосага келди.
«Сергели тумани терговчиси ўз шаънига туҳмат ёғдирган одамларга нисбатан қонуний чора кўриш бўйича рапорт билан мурожаат қилди. Биз бу одамлар топилиб ва уларга нисбатан чора кўришлари учун рапортни қабул қилиб олиб, шаҳар прокуратурасига топширдик. Агар уларда бизнинг ходимимиз айбланувчидан қандайдир мукофот олганини исботловчи далиллар бўлса, марҳамат тақдим этишсин. Бизда туҳмат учун модда бор — Ўзбекистон Республикаси Жиноят Кодексининг 139-моддаси. Ушбу ҳолатда терговчи аниқ пора олишда айбланган. Биз бунинг туҳмат эканлигини исботлаш ниятидамиз», — дейди Тошкент шаҳар ИИББ бошлиғи ўринбосари Дониёр Тошхўжаев.
Июль ойида содир бўлган нохуш ҳодиса юзасидан журналистларга жиноят ишининг айрим материаллари, хусусан, ўша кафедаги кузатув камералари ёзиб олган видеолар тақдим этилди.
Видео қаҳрамонлари кадрда соат 9 ларда пайдо бўлган. Воқеанинг ўзи эса эрталабки соат 10 лар атрофида содир этилган. Кўринишидан маст эканлиги билиниб турган ёш қиз тетикланишга қарор қилган кўринади шекилли, ерда ётган шлангни олиб сувни турли томонга сепа бошлайди. Қиз сепаётган сувлар кейинроқ, у учун мутлақо нотаниш бўлган одамга тегади. Эркак ўрнидан туриб, ташқари югуриб чиққан ҳолда хўл бўлган кўйлагини қизга кўрсатиб бақирган. Шу вақт орасида қизнинг дўстлари эркакга ташланиб қолган. Эркак эса чўнтагидан кичкина йиғма пичоқни чиқариб қизнинг елкасига санчган — оқибатда узунлиги 6—7 сантиметр келадиган унчалик чуқур бўлмаган жароҳат пайдо бўлган.
ИИББ вакилларининг сўзларига кўра, эркакка нисбатан жиноят кодексининг 277-моддаси 3-қисми «Безорилик» бўйича жиноят иши очилган ва суд томонидан 3 йилга озодликдан чеклаш жазоси тайинланган. Унга кўра, айбланувчи соат 20:00 дан эрталабки соат 7:00 гача доимий яшаш жойида бўлиши, оммавий тадбирларга бормаслиги, спиртли ичимликлар ичмаслиги, доимий равишда маҳалла посбони рўйхатидан ўтиб туриши ва бошқа шу каби чекловларга амал қилиши керак.
ИИББ бошлиғи ўринбосарининг қайд этишича, жиноят содир этилгунига қадар кўп сонли гувоҳлардан ҳеч бири қизни тинчлантиришга ҳаракат қилиб, жиноятнинг олдини олмаган — на кафега ташриф буюрганлар ва на муассаса маъмурияти.
Изоҳ (0)