Жанубий Корея суди компания ходимининг кетма-кет учта корпоративдан сўнг ўткир алкоголь интоксикациясидан ишлаб чиқаришдаги ўлимини эълон қилди. Бу ҳақда Тhе Коrеа Herald нашри хабар бермоқда.
Қайд этилишича, мамлакатнинг ишбилармонлик маданиятига кўра, меҳнат жамоалари раҳбарият билан бирга кўнгилочар масканлар ёки ресторанларга фақат байрам кунлари эмас, балки бошқа кунларда ҳам ташриф буюришлари керак. Жанубий Кореяда бундай вақт ўтказишдан воз кечиш ёмон одат ҳисобланади. Шу муносабат билан Сеул маъмурий суди марҳумнинг оиласи тарафини олган ва унинг ўлимини иш билан боғлиқ деб топган.
Маълум қилинишича, 2022 йилнинг 29 июнь куни савдо менежери мижоз билан кечки овқат қилган. 30 июнь куни эса ходим юқори мартабали ҳамкасби томонидан жамоани бирлаштириш мақсадида ташкил этилган корпоратив кечки овқатга ташриф буюрган. 1 июль куни эркак чет элдаги офиснинг икки янги ходими шарафига уюштирилган яна бир кечки овқатда иштирок этган. Охирги учрашувда тадбирнинг барча иштирокчилари харажатларни бўлишган, менежер 1 миллион вон (723 доллар) сарфлаган.
2 июль куни эркак уй ёнидаги автотураргоҳда ўз машинасида ўлик ҳолда топилган. Экспертиза хулосаларига кўра, мутахассислар ўлимга ўткир заҳарланиш сабаб бўлган деган хулосага келишган. Бу қисқа вақт ичида катта миқдордаги спиртли ичимликларни истеъмол қилиш натижасида юзага келган.
Судда асосий юридик тортишув сўнгги учрашув характери атрофида бўлган. Суғурта компанияси 1 июлдаги кечки овқат корпоратив бўлмаган деган қарорга келган. Унинг фикрича, харажатлар тақсимоти шундан далолат беради. Суд, ўз навбатида, менежер ва янги ходимлар ўртасидаги муносабатларнинг табиатини ва улар ўртасидаги ҳамкорлик айнан компания манфаатларига хизмат қилишини ҳисобга олган.
“Спиртли ичимликлар ичиш кечаси, эҳтимол, иш билан боғлиқ контекстга эга бўлган, чунки менежерни чет элга хизмат сафарига юбориш арафасида чет эллик ишчилар таклиф қилинган”, деб ҳисоблади суд.
Суднинг қўшимча қилишича, марҳумга бундай шароитда спиртли ичимликдан воз кечиш қийин бўлган ва 1 миллион вонлик харажатлар оддий шахсий учрашув учун жуда юқори ҳисобланади.
Изоҳ (0)