Тошкентда Тожикистон миллий маҳсулотлари кўргазмаси доирасида Ўзбекистон—Тожикистон бизнес-форуми бўлиб ўтди. Бу ҳақда UzDaily хабар бермоқда.
Тадбирда Ўзбекистон ва Тожикистоннинг енгил саноат, энергетика, машинасозлик, металлургия, автомобилсозлик, транспорт-логистика, озиқ-овқат, кимё саноати, қурилиш материаллари, қишлоқ хўжалиги, туризм каби соҳаларга ихтисослашган вазирлик, компания ва фирмаларидан 500 га яқин вакил иштирок этди.
Бизнес-форумда мамлакатлар ўртасидаги савдо-иқтисодий ҳамкорлик жадал ривожланаётгани, Ўзбекистонда хорижлик ҳамкорлар учун яратилаётган қулай инвестициявий муҳит, тақдим этилаётган имтиёз ва преференциялар тожикистонлик ишбилармонлар учун ҳам кенг имкониятлар яратиши билдирилди. Икки давлат иқтисодиётининг етакчи тармоқлари салоҳиятига бағишланган тақдимотлар ўтказилди.
Тадбир доирасида кимё, транспорт, саноат, қишлоқ хўжалиги, туризм соҳаларида ҳамкорликни ривожлантириш бўйича истиқболли келишувларга эришилди. 20 дан ортиқ шартнома ва 6 меморандум имзоланди.
Маълумот учун, 2016 йил якунлари бўйича икки давлат ўртасидаги маҳсулот айирбошлаш ҳажми 197 миллион , 2017 йилнинг январь сентябрь ойларида эса 178,2 миллион долларни ташкил этди.
Изоҳ (0)