Россия собиқ Иттифоқ мамлакатлари ичида қайси давлатларга энг катта ёрдам кўрсатиши маълум бўлди

Собиқ совет республикалари ичида Қирғизистон, Арманистон ва Тожикистонга Россия томонидан энг катта ёрдам кўрсатилади. Бу ҳақда Россия президенти ҳузуридаги халқ хўжалиги ва давлат хизмати академияси томонидан тайёрланган «Россиядаги иқтисодий вазият мониторинги» ҳисоботида айтилди.

Ҳисоботда айтилишича, 2015 йили Қирғизистон, Россия–Қирғизистон ривожланиш фонди маблағлари инобатга олинса, 322,8 миллион доллар ёрдам олган. 2011–2015 йиллар орасида бу ёрдам ҳажми жами 653 миллион долларни ташкил қилган.

Бундан ташқари, Арманистон 2015 йили 37,4 миллион доллар, 2011–2015 йилларда эса 57,3 миллион доллар ёрдамга эга бўлган.

Тожикистон учун бу кўрсаткичлар тегишли равишда 21,8 ва 79,5 миллион долларни ташкил этади.

2016 йилнинг биринчи ярмида Россия Қирғизистоннинг 30 миллион доллар, 2017 йил июнида эса қолган 240 миллион доллар қарзидан кечди. Охирги 11 йил ичида Россия ушбу республиканинг 703,2 миллион долларлик қарзидан воз кечди.

Россиядан моддий ёрдам оладиган давлатлар орасида Озарбайжон, Қозоғистон ва Беларусь ҳам қайд қилиб ўтилган.