12 октябрь куни Ерга хавфли масофада астероид учиб ўтади

12 октябрь куни 2012 ТС4 астероиди Ер сайёрасига яқинлашади, деб хабар беради «MK.ru».

Иммануэл Кант номидаги университет мутахассисларининг фикрига кўра,космик объект Ердан 50 минг километр масофадан учиб ўтади. Космик ҳисоб-китобларга кўра, бу ўта яқин масофа ҳисобланади.

Бирон бир космик жисмни «хавфли» деб ҳисоблаш учун у Ердан Ойга нисбатан 20 баробардан кам масофада учиб ўтиши керак.

2012 ТС4 астероидининг Ерга максимал яқин келадиган нуқтаси Ойга нисбатан 7 баробар яқинроқ.

Шунинг учун мазкур астероид Ерга хавф туғдиради, деб бемалол айтиш мумкин.

Астероид 2012 йилда кашф қилинган, аммо унинг орбитаси ўзига хос бўлгани учун, астрономлар яқин вақтларгача унинг ҳаракатланишини кузата олмаган ва Ерга қанчалик яқин келишини айта олмаган эди. Астероиднинг диаметри 13 метрни ташкил этади.

Астероид ўз ўлчами билан 2013 йилнинг февраль ойида Челябинск устига қулаган астероидни эслатади. Ўшанда астероид қулаши оқибатида 1613 киши жабрланган эди.