Бразилиянинг Минас-Жерайс штатида жойлашган боғча қоровул томонидан ёқиб юборилиши оқибатида олти нафар бола ва бир нафар тарбиячи ҳалок бўлди, яна бир неча киши жароҳатланди. Бу ҳақда «РИА Новости» хабар бермоқда.
Ҳодиса 5 октябрь, пайшанба куни Жанауба шаҳрида юз берган.
Маҳаллий ОАВларнинг хабар беришича, боғча қоровули ўзи ва болаларнинг устига спирт қуйган, шундан сўнг олов ёққан.
Тўрт ёшли тўрт нафар бола ҳодиса жойида вафот этган. Яна икки бола ва 43 ёшли тарбиячи куйиш оқибатида касалхонада ҳаётдан кўз юмган. Қоровулнинг ўзи ҳам ёнғин бошланганидан бир неча соат ўтгач, жон берган.
Маҳаллий ўт ўчириш хизматининг хабар беришича, касалхоналарда бўлиб турган 24 нафар жабрланувчидан 21 нафари болалардир.
Қоровул камида саккиз йилдан бери боғчада фаолият юритар эди, унинг руҳий касалликдан азият чекканлиги тахмин қилинмоқда.
Ушбу ҳодиса муносабати билан маҳаллий маъмурият етти кунлик мотам эълон қилди.
Изоҳ (0)