Тошкентда 8 кунда 5 киши ЙТҲ қурбони бўлди. Жавобгарларга нисбатан қандай жазо қўлланилади?
Тошкентда 25 сентябрь — 2 октябрь кунлари оралиғида инсон ўлими билан боғлиқ камида тўртта йўл-транспорт ҳодисаси юз берди. Ушбу ҳодисалар оқибатида беш киши ҳалок бўлди. Мазкур ҳолатлар жамоатчилик ўртасида баҳс-мунозараларга сабаб бўлди.
25 сентябрь
Фото: «GUVD.uz»Соат 8:00 атрофида Бунёдкор шоҳ кўчасининг Чилонзор туманидан ўтган қисмида, «Оқ тулпор» ресторани қаршисида 1992 йилда туғилган ҳайдовчи бошқарувидаги Lacetti 1981 йилда туғилган аёлни уриб юборган. Жабрланувчи ҳодиса жойида вафот этган. Ҳайдовчига нисбатан Жиноят кодексининг 266-моддаси 2-қисми («Транспорт воситасини бошқарувчи шахс томонидан транспорт воситалари ҳаракати ва улардан фойдаланиш хавфсизлиги қоидаларини бузиш, одам ўлишига сабаб бўлса») аломатлари билан жиноят иши қўзғатилган.
27 сентябрь
Фото: «GUVD.uz»18:20 атрофида Амир Темур шоҳ кўчасининг Юнусобод туманидан ўтган қисмида 1988 йилда туғилган ҳайдовчининг бошқарувидаги Captiva автомашинаси тартибга солинмаган пиёдалар ўтиш жойида 1991 йилда туғилган эркакни уриб юборган. Жабрланувчи пиёда ҳодиса жойида вафот этган. Ҳайдовчига нисбатан Жиноят кодексининг 266-моддаси 2-қисми аломатлари билан жиноят иши қўзғатилган.
29 сентябрь
Фото: «GUVD.uz»Соат 19:20 атрофида Юнусобод туманидаги Осиё кўчасида (Ирригация институти ётоқхонаси қаршисида) 1988 йилда туғилган ҳайдовчи Spark машинасини бошқариб кетаётиб, 1995 ва 1987 йилларда туғилган икки аёлни уриб юборган, зарбдан улар қарама-қарши йўналишда ҳаракатланиб келаётган Nexia’га бориб урилган. Жабрланувчиларнинг ҳар иккиси Тошкент тиббиёт академиясида вафот этган. Ҳолат юзасидан Жиноят кодексининг 266-моддаси 3-қисми «а» банди («транспорт воситасини бошқарувчи шахс томонидан транспорт воситалари ҳаракати ва улардан фойдаланиш хавфсизлиги қоидаларини бузиш, одамлар ўлимига сабаб бўлса») аломатлари билан жиноят иши қўзғатилган.
2 октябрь
Фото: «MyTashkent.uz»
Таниқли журналист Галина Чебакова йўл-транспорт ҳодисаси оқибатида ҳалок бўлди. Маълумотларга кўра, 79 ёшли аёлни ити билан сайр қилиб юрган вақтда машина уриб кетган. Воқеанинг бошқа тафсилотлари маълум эмас, шаҳар ИИББ бу ҳодиса бўйича ҳозирча расмий ахборот бергани йўқ.
Жиноят кодексининг 266-моддаси қандай жазони назарда тутади?
Транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш баданга ўртача оғир ёки оғир шикаст етказилишига сабаб бўлса, —энг кам ойлик иш ҳақининг эллик бараваригача миқдорда жарима ёки уч юз олтмиш соатгача мажбурий жамоат ишлари ёхуд уч йилгача ахлоқ тузатиш ишлари билан жазоланади.
Ўша қилмиш одам ўлишига сабаб бўлса, —муайян ҳуқуқдан маҳрум қилиб, етти йилгача озодликдан маҳрум қилиш билан жазоланади.
Ўша қилмиш:а) одамлар ўлимига;б) ҳалокатга;в) бошқа оғир оқибатларга сабаб бўлса, —муайян ҳуқуқдан маҳрум қилиб, ўн йилгача озодликдан маҳрум қилиш билан жазоланади.
Изоҳ (0)