Тошкент шаҳар ҳокимлиги: Шаҳарда 4 хонали уйларга талаб юқори экани маълум бўлди

Тошкент шаҳар ҳокимлигида 3 октябрь куни пойтахтда олиб борилаётган қурилиш ва ободонлаштириш ишларининг бориши юзасидан матбуот анжумани бўлиб ўтди. Матбуот анжуманида иштирок этган шаҳар архитектура ва қурилиш бош бошқармаси бошлиғи ўринбосари  Асомиддин Тожиев Тошкент шаҳрида асосан тўрт хонали уйларга талаб юқори эканлигини маълум қилди:

Сергелидаги уйларнинг қурилиши аҳоли ўртасида неча хонали уйларга талаб юқори эканлигини кўрсатиб берди. Биз авваллари 40 фоиз аҳоли икки, 40 фоиз аҳоли уч ва 20 фоиз аҳоли тўрт хонали уйларни сотиб олиш истагини билдиради, деб ҳисоблардик. Аммо, шаҳарда тўрт хонали уйларга талаб юқори экан.

Ота-она, фарзанди ва келини билан яшашга тўрт хонали уйни сотиб олиш истаги билдирилмоқда. Икки ва уч хонали уйларга ҳам ўз ўрнида эҳтиёж бор. Ҳар бир оила ўзининг молиявий аҳволидан келиб чиққан ҳолда уйга пул тўлайди.

Айримлар икки хонали уй олганидан кейин, уни уч хонали қилишга интилади. Чунки буни шароит тақозо этади. Фарзандлар улғайгач, каттароқ уйга эҳтиёж сезилади.

Асомиддин Тожиев, Тошкент шаҳар архитектура ва қурилиш бош бошқармаси бошлиғи ўринбосари