Нидерландиядан Фарғона шаҳрида истиқомат қилувчи Қ.Қаюмов номига юборилган почта жўнатмасини кўздан кечириш давомида божхоначилар ушбу жўнатмада 10 граммга яқин марихуана ва гашиш наркотик моддалари юборилганлиги аниқланди. Бу ҳақда Тошкент шаҳар божхона бошқармаси ахборот хизмати хабар берди.
Амалдаги тартибларга мувофиқ, Ўзбекистон Республикасига гиёҳвандлик воситалари, психотроп моддалар ва прекурсорларни олиб кириш тақиқланади.
Тошкентда истиқомат қилувчи Б.Диёров (исм-шарифлар ўзгартирилган) номига Россиядан юборилган почта жўнатмаси белгиланган тартибда божхона кўригидан ўтказилганда, божхона декларациясида кўрсатилмаган, ов қуроллари учун мўлжалланган салкам 9 килограмм оғирликдаги 1250 дона бўш гилзалар юборилганлиги аниқланди. Орадан 10 кун ўтмай худди шу манзилдан почта жўнатмаси орқали яна ушбу фуқарога 9 килограммдан ортиқ оғирликдаги 1300 дона бўш гилзалар юборилган.
2008 йил 12 августда Женевада имзоланган Халқаро почта Конвенцияга ҳамда Ўзбекистон Республикаси Адлия вазирлигида 2011 йил 18 апрелда 2219-сон билан рўйхатга олинган «Почта алоқаси хизматларини кўрсатиш» Қоидаларига асосан почта жўнатмалари орқали ўқ-дорилар ва гиёҳвандлик воситаларини жўнатилиши тақиқланган.
Изоҳ (0)