Тошкент шаҳар божхона бошқармаси товарларни нотўғри декларациялаш, яъни товарлар ҳақида нотўғри маълумот бериш ҳолатларини аниқлади, деб хабар берди божхона бошқармаси матбуот хизмати.
Бухоро вилоятида истиқомат қилувчи А.Ниёзов Россияга юбораётган почта жўнатмасидаги товарларни декларацияда аёллар курткаси деб қайд этган. Аммо почта жўнатмаси божхона кўригидан ўтказилганда куртка ўрнига қиймати 4,8 миллион сўмлик 24 дона қоракўл терилари юборилганлиги фош бўлди.
Худди шундай яна бир ҳолатда эса бухоролик Н.Самигов ҳам Украинага қиймати 11 миллион сўмдан ортиқ бўлган 56 дона қоракўл териларини декларацияда гўёки эркаклар курткаси сифатида кўрсатиб, жўнатмоқчи бўлганлиги аниқланди.
Ғиждувон туманида истиқомат қилувчи У.Асилов эса қоракўл териларини почта орқали ноқонуний равишда олиб чиқишнинг ғайроддий усулини «кашф» қилди. Декларацияга мувофиқ, ушбу шахс томонидан почта жўнатмасида Россияга кўрпа юборилаётган эди. Аммо, кўрпа астари орасига пахта қавиш ўрнига, қиймати 6 миллион сўмлик 30 дона қоракўл терилари жойлаштирилган экан.
Халқаро почта иттифоқи аъзоси сифатида Ўзбекистон Республикасида ҳам Халқаро почта Конвенцияси талабларига мувофиқ, жўнатилаётган почта жўнатмалари бўйича CN 22 ёки CN 23 шаклидаги божхона декларациялари тўлдирилади ва унда жўнатмада юборилаётган барча товарларнинг номлари қайд қилиниши белгилаб қўйилган.
Таъкидлаш жоизки, жорий йилнинг саккиз ойи давомида Тошкент шаҳар божхона бошқармасининг «Бошпочтамт» ташқи иқтисодий фаолият божхона пости ходимлари томонидан аниқланган 130 та қонунбузарлик ҳолатларида қиймати 1 миллиард 361 миллион сўм бўлган товар моддий бойликларнинг ноқонуний олиб ўтилишига чек қўйилди.
Изоҳ (0)