Россия Ҳаво-космик кучлари икки сутка ичида Фрот дарёсининг шарқий соҳилларидаги ИШИД ташкилотининг 304 нафар жангарисини йўқ қилди. Бу ҳақда Россия Мудофаа вазирлигининг расмий вакили генерал майор Игорь Конашенковга асосланиб, «ТАСС»хабар берди.
Мудофаа вазирлигининг маълумотларига кўра, ташкилотнинг 304 жангариси, шунингдек, турли даражадаги еттита дала қўмондонлари йўқ қилинган ва яна 170 дан ортиғи жароҳат олган.
«Жумладан, улар ичида ИШИДнинг Фрот водийсидаги қўшинлари ҳаракатини йўналтириб турувчи қозоғистонлик Абу Ислом ал-Қозоқий ҳам бор», — дея таъкидлади Конашенков. Шунингдек, унинг маълум қилишича, авиазарба оқибатида ИШИДнинг хорижлик ёлланма жангариларини тайёрловчи маркази,«жумладан, 40 га яқин Шимолий кавказлик жангарилар ҳамда террорчиларнинг мобил снайпер гуруҳи» йўқ қилинган.
Конашенковнинг сўзларига кўра, Россия Ҳаво-космик кучлари террорчиларининг учта қўмондонлик пунктини, тўққизда таянч пунктини, тўртта қурол-яроғ омборини, саккизта танкини, учта артиллерия қурилмаларини, юқори калибрли қуроллар ўрнатилган 17 та йўлтанламасини йўқ қилган.
2017 йилнинг 22 сентябридаги маълумотларга кўра, Россия самолётлари ушбу операцияларни бошлаганидан бери Сурияга 30 мингдан ортиқ парвозларни амалга оширган, 92 мингдан ортиқ зарба берган.
Изоҳ (0)