NASA йўлдошлари жорий йилнинг июль ойида Ларсен музлигининг парчаланишидан сўнг илк марта гигант айсбергнинг суратини олишга муваффақ бўлди ва унинг бўлакланаётгани белгиларини қайд этди. Бу ҳақда «РИА Новости» хабар бермоқда.
«Июлда Антарктида ҳудудида қутб кечаси ҳукмронлик қилди, шунинг учун олимлар мазкур айсбергни радарлар ва инфрақизил тасвирлардан фойдаланган ҳолда ўрганишга мажбур бўлди. Илк фотосуратлар сентябрнинг ўрталарида олинди. Бир неча ҳафта давом этган кузатувлар шуни кўрсатдики, А-68 айсберги дастлаб олдинга ва ортга ҳаракатланиб турди, бунинг натижасида эса у икки бўлакка бўлинди», — дейилди NASA хабарида.
Иқлимшунос ва океаншунослар ҳамда бошқа олимлар узоқ вақтдан бери иқлимнинг ўзгариши асосан сайёрадаги шимолий муз заҳиралари—Гренландия ва Шимолий қутб музликларининг парчаланишига олиб келади, деб ҳисоблаб келар эди.
Сўнгги йилларда эса бу тушунча ўзгара бошлади, сабаби олимлар биринчи бўлиб шимолий музликлар эмас, Антарктиданинг бир қисми парчаланишини аниқлади. Бу эса денгиз сатҳининг ҳалокатли кўтарилишига олиб келади.
Шу сабабдан ҳам IceBridgе лойиҳаси доирасида NASA разведка билан шуғулланувчи самолётлар ёрдамида жанубий музликларни мунтазам кузатиб боради. ЭКА эса уларнинг ҳолатини Sentinel-1 ва CryoSat-2 йўлдошлари орқали кузатади.
Мазкур тадқиқотлар шуни кўрсатадики, парчаланишга энг мойил бўлган биринчи «номзод» Ларсен музлиги ҳисобланади.
У 1995 йилда парчалана бошлаган. IceBridgе’нинг маълумотларига кўра, музликнинг сўнгги бўлаклари жорий йилнинг ёзида парчаланиши керак эди.
Шундай бўлди ҳам. NASA томонидан олинган суратларга кўра ўтган йилнинг декабрь ойида Ларсен музлигида узунлиги 112 километр, эни 100 метр бўлган улкан ёриқ пайдо бўлди.
Бу ёриқ 2017 йилда каттара бошлади ва узунлиги 200 километрга етди. Натижада эса майдони 6500 кавдрат километр бўлган улкан айсберг юзага келди. Унинг майдони катталиги бўйича Эстония давлатиникига тенг келади.
Изоҳ (0)