Facebook компанияси АҚШда бўлиб ўтган сайловлар вақтида Россиядан ижтимоий тармоққа турли сиёсий мақсадларни кўзлаб жойлаштирилган реклама эълонлари ҳақида Конгрессга батафсил маълумот берди. Facebook матбуот хизматининг таъкидлашича, умумий миқдорда ушбу эълонларни АҚШда 10 миллионга яқин одам кўрган, деб хабар берди Meduza.
Ижтимоий тармоқ бу турдаги эълонларнинг уч мингга яқинини топган. Уларнинг аксарияти ижтимоий, сиёсий ва ирқий масалаларга тегишли.
2016 йилнинг 8 ноябридаги сайлов кунига қадар ушбу рекламаларнинг томоша қилинганлиги фоизи 44 га тенг, қолган 56 фоизи сайловлардан кейин кўрилган.
Барча эълонлар аниқ мақсадга, яъни муайян манфаатларга эга бўлган муайян демографик гуруҳларга қаратилган.
Facebook’нинг қайд этишича, улар шубҳали рекламаларни бирданига аниқлай олишмаган, чунки ижтимоий тармоққа жуда кўп рекламалар жойлаштирилади ва уларнинг барчасини текширишнинг имкони йўқ. Ижтимоий тармоқнинг таъкидлашича, ушбу эълонларнинг аксарияти Facebook қоидаларини бузмаган.
Facebook ижтимоий тармоғи 2017 йилнинг сентябрь ойи бошида АҚШдаги сайловлардан олдин сиёсий реклама тарқатган 470 та сохта аккаунт ва саҳифалар ҳақида хабар берганди.
АҚШда президентлик сайловларига Россиянинг аралашуви ҳақида кенг кўламли тергов ишлари бошлаган. Америка махсус хизматларининг ҳисоблашича, россиялик хакерлар Кремль топшириғига биноан демократларнинг ёзишмаларини қўлга киритиб, Дональд Трампнинг ғалабасига ёрдам бериш мақсадида уларни сайловдан олдин тармоққа жойлаштирган.
Изоҳ (0)