Хитойда ишлаётган Шимолий Корея фуқаролари оммавий тартибда ватанига қайтишни бошлади. Бу ҳақда Yonhap агентлигининг Пекиндаги манбаларига таяниб, «ТАСС» маълум қилди.
«2017 йилнинг биринчи ярмида биргина КХДР билан чегарадаги Даньдун шаҳрида камида 20 минг Шимолий Корея фуқароси меҳнат қиларди. Бироқ Хитой санкцияларни кучайтирганидан сўнг уларнинг сони сезиларли даражада камайди», — таъкидлади агентлик.
Агентликка кўра, Хитой расмийлари 12 сентябрь куни КХДР фуқаролари визаларини узайтирмаслик ва янги визаларни бериш жараёнини қийинлаштиришга кўрсатма берди. Шунингдек, 28 сентябрда 120 кун давомида Хитойда ишлаётган барча КХДР ва унинг фуқароларига тегишли компанияларни ёпиш ҳақида фармон қабул қилинди.
Пекиннинг мазкур чоралари Шимолий Корея амалга оширган ядро синовларига жавобан БМТ Хавфсизлик кенгаши қабул қилган санкциялар билан боғлиқлиги билдирилмоқда.
Маълумот учун, хорижий давлатларда КХДРнинг 100 мингдан ортиқ фуқароси меҳнат қилади. Улар ўз ватанига юборадиган маблағ миқдори йилига 500 миллион доллар баҳоланади.
Изоҳ (0)