Лас-Вегасдаги отишмани уюштирган Стивен Пэддокнинг 40 дан ортиқ қуроли бўлган. Бу ҳақда округ шерифининг ёрдамчисига асосланиб, «РИА Новости» хабар берди.
«Биз Mandalay Bay меҳмонхонасидан 23 та ва унинг Мескитдаги уйидан (Невада штати) 19 та ўқотар қуролларни топдик», — деди полиция вакили.
Унинг қўшимча қилишича, тергов 64 ёшли Пэддокни ҳамон ягона жиноятчи сифатида кўрмоқда ва у ёлғиз ўзи ҳаракат қилган деган гумонда. «Биз ОАВ ҳамда ижтимоий тармоқларда турли миш-мишлар тарқалганини биламиз, аммо бизда ушбу гап-сўзларни тасдиқловчи маълумотлар йўқ», — деди полиция офицери.
Пэддок Лас-Вегасдаги аэропорт ҳамда Mandalay Bay меҳмонхонаси ўртасида бўлиб ўтаётган мусиқий фестивалга йиғилган одамларга қарата меҳмонхонанинг 32-қаватидан ўқ узган. Сўнгги маълумотларга кўра, 59 киши ҳалок бўлган, 500 дан ортиқ одам жароҳат олган.
Изоҳ (0)