Ер юзида жорий йили 2 миллиондан ортиқ қочоқ қайд этилди. Бу ҳақда БМТ қочоқлар иши бўйича олий комиссари бошқармаси ижроия қўмитаси 68-сессиясида маълум қилинди, дея хабар беради «Коммерсантъ».
«2017 йилда 2 миллиондан ошиқ киши қочоққа айланди ва мамлакатларини тарк этди. Аксарият ҳолларда улар касалликка чалинган, жароҳатланган ва оч. Олис чегара ҳудудларида, қашшоқлик ва қолоқликдан азият чекаётган жамоаларда жойлашган», — деди комиссар Филиппо Гранди.
Мазкур рақам, жумладан, Жанубий Суданнинг 650 минг муҳожири, Мьянмадан Бангладешга қочаётган рохинжа халқининг 500 минг вакилини қамраб олди.
БМТ манбаларига кўра, 2016 йилда дунё бўйича қочоқлар сони 65,6 миллион кишини ташкил этди.
Сессияда иштирок этган давлатлар вакиллари Нью-Йоркда келгуси йили миграция ҳақида глобал пакт қабул қилиш учун тўпланиш ҳақида келишиб олди. Ушбу пакт ҳукуматлар даражасида маъқулланган ва халқаро миграциянинг барча жиҳатларини жамлаган биринчи ҳужжат бўлиши кўзда тутилмоқда.
Изоҳ (0)