Самарқанд вилоятида Бош прокуратура ҳузуридаги Мажбурий ижро бюроси ходимларининг қонуний фаолиятига тўсқинлик қилиш ҳолатлари қайд этилди. Бу ҳақда «Ўзбекистон 24» хабар берди.
Самарқанд вилояти Булунғур тумани «Гулзор» маҳалласида истиқомат қилувчи Фахриддин Турсуновнинг истеъмол қилинган электр энергиясидан 7 миллион сўмдан зиёд қарздорлиги аниқланиб, бюро ходимлари хонадонни тармоқдан узаётган вақтида Турсунов давлат инспектори Тошматовни ҳақоратли сўзлар билан ҳақорат қилган. Шунингдек, у МИБ инспекторига турли тан жароҳатлари етказган.
Паяриқ туманидаги «Чол Мўйин» маҳалласида яшовчи ота-бола Бахтиёр ва Баҳром Қиличовлар савдо дўконига ўғринча йўл билан электр симини тортиб, ноқонуний фойдаланиб келаётганлиги МИБ ходимлари томонидан фош қилинган. Шундан сўнг, ҳужжатларни расмийлаштириш жараёнида дўкон эгалари таёқ, тош ҳамда қўл ва оёқ билан МИБ ходимларига тан жароҳати етказган.
Пастдарғом тумани «Новчандир» маҳалласида ҳам шунга ўхшаш ҳолат қайд этилди. Бюро ходимлари Сойибжон Жумоновни электр энергиясидан қарзи борлиги ҳақида огоҳлантириш мақсадида хонадонига кирганда маст ҳолдаги уй эгаси томонидан турли уятсиз сўзлар билан ҳақоратланган. Шунингдек, уй эгаси бюро ходимининг юз қисмига мушт туширган.
Айни вақтда юқоридаги ҳолатлар бўйича қонунбузарларга нисбатан жиноят иши қўзғатилган.
Маълумот учун: Жиноят кодексининг 219-моддасида хизмат вазифасини бажараётган ҳокимият вакилининг қонуний фаолиятига фаол қаршилик кўрсатганлик учун 5 йилгача озодликдан маҳрум этиш, 140-моддасида эса ҳақорат қилган учун энг кам ойлик иш ҳақининг 600 баравари миқдорида жарима белгиланган.
Изоҳ (0)