Саудия Арабистони фуқароси аёл ҳайдовчиларни ёқиб юборишга ваъда бергани учун қамоққа олинди. Бу ҳақда Reuters хабар берди.
Анъанавий арабча кийимда бўлган эркак интернетга жойланган видеомурожаатда бузилган машинадаги аёлни кўрса, машинани ҳам, аёлни ҳам ёқиб юборишга ваъда берган.
Маълумотларга кўра, 20 ёшли эркак Аш-Шарқия маъмурий округи губернаторининг буйруғи билан қўлга олинган.
Саудия Арабистонида аёлларга автомобиль бошқаришга рухсат берувчи фармон 26 сентябрда имзоланган. У 2018 йилнинг июнь ойида кучга киради.
Бир неча ўн йиллар давомида расмийлар бу тақиққа турлича изоҳ берган. Масалан, аёлнинг машина бошқариши саудия маданиятига тўғри келмайди; қўшни автомобилни аёл киши бошқараётганда, эркак ҳайдовчи ўзини қандай тутишни билмайди. Ҳаттоки, аёл кишининг автомобиль бошқариши бетартиб жинсий алоқага ва саудия оиласининг бузилишига олиб келади, деган фикрлар ҳам таъкидланган.
Дунё бўйича нефть нархи арзонлашганидан сўнг Саудия Арабистони углеводородга боғланиб қолмаслик учун иқтисодиётни қайта қуришга ҳаракат қилмоқда ва фуқароларни хўжаликнинг истиқболли соҳаларида иш излашга чорламоқда. Қиролликнинг кўплаб аёллари ишга бориш учун такси буюртма қилишга мажбур бўлган. Бу эса уларнинг даромадларини камайтирган ва иш фаолиятини давом эттириш истагини сусайтирган.
Изоҳ (0)