Ayol haydovchilarni yoqib yuborishga va’da bergan saudiyalik erkak qamoqqa olindi

Saudiya Arabistoni fuqarosi ayol haydovchilarni yoqib yuborishga va’da bergani uchun qamoqqa olindi. Bu haqda Reuters xabar berdi.

An’anaviy arabcha kiyimda bo‘lgan erkak internetga joylangan videomurojaatda buzilgan mashinadagi ayolni ko‘rsa, mashinani ham, ayolni ham yoqib yuborishga va’da bergan.

Ma’lumotlarga ko‘ra, 20 yoshli erkak Ash-Sharqiya ma’muriy okrugi gubernatorining buyrug‘i bilan qo‘lga olingan.

Saudiya Arabistonida ayollarga avtomobil boshqarishga ruxsat beruvchi farmon 26-sentabrda imzolangan. U 2018-yilning iyun oyida kuchga kiradi.

Bir necha o‘n yillar davomida rasmiylar bu taqiqqa turlicha izoh bergan. Masalan, ayolning mashina boshqarishi saudiya madaniyatiga to‘g‘ri kelmaydi; qo‘shni avtomobilni ayol kishi boshqarayotganda, erkak haydovchi o‘zini qanday tutishni bilmaydi. Hattoki, ayol kishining avtomobil boshqarishi betartib jinsiy aloqaga va saudiya oilasining buzilishiga olib keladi, degan fikrlar ham ta’kidlangan.

Dunyo bo‘yicha neft narxi arzonlashganidan so‘ng Saudiya Arabistoni uglevodorodga bog‘lanib qolmaslik uchun iqtisodiyotni qayta qurishga harakat qilmoqda va fuqarolarni xo‘jalikning istiqbolli sohalarida ish izlashga chorlamoqda. Qirollikning ko‘plab ayollari ishga borish uchun taksi buyurtma qilishga majbur bo‘lgan. Bu esa ularning daromadlarini kamaytirgan va ish faoliyatini davom ettirish istagini susaytirgan.