Ироқнинг Ироқ Курдистони билан чегарадош бўлган Киркук вилояти ҳукумати бу ерда жойлашган нефть конларини Бағдод назорати остига беришдан бош тортди, деб ёзади «ТАСС» вилоят Кенгаши раҳбари Ребвар Талабанийга таяниб.
«Киркук ҳукумати нефть конларини ҳеч кимга бермайди, улар Ироқ Курдистони назорати остида бўлади», — деди вилоят маъмурияти раҳбари. Унинг сўзларига кўра, «пешмерг» курд ҳарбийлашган отрядлари нефтга бой майдонларни, Ироқ армияси ташлаб кетгач, ИШИДга қарши курашиб қўлга киритган. «Бунинг учун миннатдорлик билдириш ўрнига, Бағдод бундай қарорларни қабул қилмоқда», — дея қўшиб қўйди Талабаний.
Киркук Кенгаши раҳбарининг баёноти Ироқ парламенти Ироқ Курдистонидаги мустақиллик ҳақидаги референдумга жавобан ушбу вилоятдаги барча нефть корхоналарини марказий ҳукумат назорати остига қайтаришни талаб қилгач, янгради.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)