ИШИД террорчилик гуруҳи жангарилари «барча фронтларда — Ироқда ҳам, Сурияда ҳам, мағлубиятга учрамоқда». Бу ҳақда Америка қуруқликдаги қўшинлари полковниги Райан Диллон маълум қилди, деб ёзади «ТАСС». У Ироқ ва Сурияда АҚШ раҳбарлигидаги мамлакатлар гуруҳи томонидан амалга оширилаётган «Саботли қатъият» операцияси штаби расмий вакили ҳамдир.
«ИШИД ҳам Ироқдаги, ҳам Суриядаги сўнгги истеҳкомли туманларини сақлаб қолишга ноилож интилган ҳолда, барча фронтларда мағлубиятга учрамоқда», — деди полковник.
«Ироқда айни пайтга қадар жами майдони 42 минг квадрат км бўлган ҳудудни жангарилардан тозалашга муваффақ бўлдик, 4 миллиондан зиёд киши ортиқ ИШИД назорати остида эмас», — деди у.
Полковнинг айтишича, Суриянинг Раққа шаҳрида даҳаларнинг 75 фоиздан ортиғи жангарилардан озод этилган. Жангарилардан тозаланган ҳудудларнинг жами майдони 44 минг квадрат километрдан ошади. 2 миллионга яқин киши ИШИД назорати остидан озод қилинган.
Диллон қайд этишича, Раққада 400 дан 800 гача ИШИД жангарилари қолган бўлиши мумкин, уларнинг кўпчилигини чет эллик ёлланма аскарлар ташкил қилади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)