Ҳинд аёлларига хос гўзаллик сирлари
Ҳинд аёллари – латофатнинг ҳақиқий тимсоли ҳисобланади. Машҳур гўзаллар ўзларининг бенуқсон териси ва ҳашаматли ялтиллаган сочлари билан танилган. Улар гўзаллигининг сири нимада?
Аюрведа
Аюрведа – қандай қилиб ўзи ва ўз танаси билан уйғунликда яшаш ҳақидаги ҳақиқий илм. Ва бу илмда гўзаллик мавзуси муҳим рол ўйнайди. Масалан, аюрведага асосан ҳинд аёллари сочларини ҳеч қачон совуқ ёки ҳаддан ташқари иссиқ сувда ювишмайди. Сочлар учун фойдаси кўпроқ тегиши учун, уни илиқ ҳолда ишлатишади.
Шунингдек, бутун танада жойлашган энергетик нуқталарга иссиқлик орқали таъсир ўтказиш учун юз ва танага ишлатиладиган ёғлар ва кремлар бироз иситилади.
Кукунли ниқоблар
Ҳинд аёллари тупроқ, зарчива, хина, нўхат уни ва майдаланган шишикайни ёғлар, сут ва асал билан аралаштирадилар – ва терини намловчи, юмшатувчи, тешикчаларини қисқартирувчи ва таранглаштирувчи ҳаддан ташқари самарали ниқобларга эга бўладилар.
Ҳинд аёллари тез ва кескин ўзгариш учун косметологларга мурожаат қилмайдилар. Улар йиллар давомида одатга айланиб қолган кундалик парваришлашга катта аҳамият берадилар.
Кокос ёғи ва бошқа табиий маҳсулотлар
Албатта, ҳинд аёллари ҳам бошқа замонавий аёллар каби тайёр косметик воситалар – кремлар, зардоблар, тониклар ва лосонлардан жуда кўп фойдаланишади. Лекин улар табиий воситаларни кўпроқ афзал кўришади. Масалан, ҳинд аёллари сочлар гўзаллиги учун кокос ёғини ишлатишади ва уни ҳеч қачон қимматбаҳо балзамга алмашишмайди. Терини тозалашда зарчивадан, тана териси учун эса – асал ва ним дарахти баргларининг қайнатмасидан фойдаланишади.
Массаж
Япон аёллари каби ҳинд аёллари ҳам массажга алоҳида эътибор беришади. Ҳиндистонда массаж юз териси ва тананинг гўзаллиги учун ҳам, соғлиғи учун ҳам ҳақиқий таомил ҳисобланади.
Ўтлар, ёғлар, хушбўй моддалар ва зираворлар билан массаж қилиш Ҳиндистонда жуда оммабопдир. Ҳинд аёллари целлюлит билан курашишда майдаланган занжабил ва зарчива аралашмасидан фойдаланишади. Бу аралашмани тананинг муаммоли жойларига суришади.
Манба: «Mamas-club.com»
