Ўзбекистон ҳукумати «Ўзбекистон металлургия комбинати»даги давлат улушини SFI Management Group хорижий компаниясига ишончли бошқарувга топширди. Бу ҳақда Norma хабар бермоқда.
Мазкур қарор комбинатнинг корпоратив бошқарув тизимини тубдан қайта кўриб чиқиш ва замонавий талаблар асосида такомиллаштириш зарурати билан изоҳланмоқда.
Энди «Ўзметкомбинат» бошқаруви раисининг барча ўринбосарлари кузатув кенгаши томонидан SFI Management Group’нинг таклифи асосида тайинланади ёки лавозимидан озод этилади.
Бундан ташқари, компания корхонанинг ташкилий тузилмаси ҳамда ижроия аппарати тузилмасига ўзгартиришлар киритиш ҳуқуқига эга бўлади.
Айни вақтда, комбинат бошқаруви раиси акциядорларнинг умумий мажлиси томонидан сайланади ва Ўзбекистон Президенти билан келишилган ҳолда Вазирлар Маҳкамаси томонидан тасдиқланади.
Қайд этиш жоиз, аввалроқ SFI Management Group компанияси «Пахтакор» футбол клубининг 80 фоиз акциясини сотиб олгани маълум бўлган эди. Компания хорижий инвестор сифатида «Пахтакор» тизимидаги спорт инфратузилмаларига беш йил давомида камида 200 миллиард сўм сармоя киритиш мажбуриятини олган.
Мавзуга доир: Шавкат Мирзиёев қарори билан «Пахтакор» моддий-техник базасининг 80 фоизи хорижий инвесторга берилди
Бу маълумотларда SFI Management Group’га 2017 йил январида асос солингани, у масъулияти чекланган жамият шаклида фаолият олиб бориши, консалтинг хизматлари кўрсатиши ва инвестициявий лойиҳаларни бошқариш билан шуғулланиши таъкидланади.
Изоҳ (0)