Амстердамда IBC-2017 телекоммуникация ва мультимедиа технологиялари кўргазмаси бўлиб ўтди, дея хабар бермоқда «Жаҳон» АА.
Ҳар йили ўтказиладиган мазкур тадбир Европадаги нуфузли кўргазмалардан бири саналади ҳамда телекоммуникация соҳасида дунёдаги энг моҳир мутахассислар иштирокидаги анжуман ва кўргазмадан иборатдир.
Жорий йилда IBC’да дунёнинг 170 та давлатидан 55 минг иштирокчи қатнашди. Amsterdam RAI мажмуасининг 15 та кўргазмалар залида 1600 дан зиёд компаниялар ўзларининг товар ва ишланмаларини намойиш этди. Беш кун давомида конференцияда рақамли ахборот технологиялари соҳаиснинг 300 дан зиёд мутахассислари маърузалар қилди. Кўргазмадан мультимедиа ва эфирга узатиш тармоғи, рақамли технологиялар ва товарлар, шунингдек, мобил алоқа хизмати ва замонавий сунъий йўлдош тизимининг хилма-хил намуналари ўрин олди.
IBC-2017 ишида Ўзбекистон миллий телерадиокомпанияси ва «Ўзбеккино» миллий агентлиги вакиллари ҳам қатнашди. Хорижий шериклар билан учрашувлар чоғида уларга Ўзбекистонда миллий кино санъати ва телерадиокомпания тизимини эфирга узатишнинг рақамли шаклига ўтказиш учун замонавий технологиялар билан жиҳозлаш борасида қабул қилинган чора-тадбирлар ҳақида маълумот берилди. Шунингдек, Ўзбекистоннинг иқтисодий ва сармоявий салоҳияти, хусусан, хорижий инвесторларга илғор телекоммуникация технологиялари ишлаб чиқаришни йўлга қўйиш имкониятларига бағишланган тақдимот бўлиб ўтди.
Изоҳ (0)