Ироқдаги курд мухторияти ҳудудида 25 сентябрь куни Ироқ Курдистони мустақиллиги масаласидаги референдумда овоз бериш бошланди, дея хабар бермоқда «ТАСС».
Хабар беришларича, сайлов участкалари маҳаллий вақт билан 7:00 да (Тошкент вақти билан 9:00 да) очилган, улар 18:00 гача овозларни қабул қилади.
Умумий ҳисобда 5,2 миллион киши рўйхатга олинган бўлиб, улар: «Сиз Курдистон ҳудуди ва ундан ташқаридаги курд ҳудудлари мустақил давлат бўлишини истайсизми?», деган саволга «Ҳа» ёки «Йўқ» деб жавоб бериши керак.
Плебиссит натижалари сайлов участкалари ўз ишини якунлаганидан бир кун ўтиб эълон қилинади.
Ироқ Курдистони — Ироқ ҳудудидаги, кенг мухторият мақоми Ироқ Конституциясида белгилаб қўйилган Курд мухтор туманининг норасмий номидир.
Бу ҳудуд Ироқ шимоли ва шимоли-шарқидаги курдлар ўрнашган Даҳук, Сулаймония ва Арбил вилоятларини қамраб олади.
Плебиссит нафақат расман Ироқ Курдистони таркибига кирувчи вилоятларда, балки ундан ташқаридаги, бироқ курдлар кўпчилик бўлган баҳсли вилоятлар — Киркук, Найнава ва Диялада ҳам ўтказилмоқда.
Ироқ марказий ҳукумати мазкур референдумнинг ўтказилишига қарши ва уни конституцияга зид, деб ҳисобламоқда. Шунингдек, Туркия ва Эрон ҳам Ироқнинг ҳудудий яхлитлиги тарафдори.
Бундан ташқари, АҚШ ва бир қатор Европа мамлакатлари ҳам террорчиликка қарши кураш ва минтақавий хавфсизликни таъминлаш йўлида ҳаракатлар олиб борилаётган бир вақтда мазкур референдумнинг ўтказилишини ноўрин, деб ҳисобламоқда.
Изоҳ (0)