Qashqadaryolik fuqaro 23 yil avval “Qashqadaryo dori-darmon” xususiylashtirilishi davomida qonun buzilganini da’vo qildi

Ijtimoiy tarmoqlarda “Qashqadaryo dori-darmon” aksiyadorlarining aksiyalari davlat foydasiga musodara qilinishi, bunga korxona xususiylashtirilayotganda tegishli hujjatlarni rasmiylashtirish chog‘i qonunbuzilishiga yo‘l qo‘yilgani to‘g‘risida yo‘llangan shikoyat sabab ekanligi haqida xabar tarqaldi. Bu haqda “Biznes-daily.uz” xabar bermoqda.

Shuningdek, ayni damda korxonaning 200 dan ziyod ishchi-xizmatchisining hafsalasi pir bo‘lib, qo‘li ishga bormayotgani ta’kidlangan.

Xo‘sh, bu gap-so‘zlarda jon bormi-yo‘qmi? 

Qashqadaryo viloyatidagi sobiq “Farmatsiya” ishlab chiqarish birlashmasi mehnat jamoasining 1994-yil 29-martda bo‘lib o‘tgan umumiy yig‘ilishida mazkur korxona va uning bazasini ochiq turdagi aksiyadorlik jamiyatiga aylantirish to‘g‘risida qaror qabul qilingan. O‘sha yili 30-iyunda shu xususdagi buyruq chiqarilgan.

Yaqinda esa Qashqadaryo viloyatida yashovchi fuqarodan ariza kelib tushdi. Unda “Qashqadaryo viloyat dori-darmon” aksiyadorlik jamiyatini (sobiq “Farmatsiya” birlashmasi) davlat tasarrufidan chiqarish jarayonida, ayniqsa, uning mulklarini narxlashda amaldagi qonunlarga rioya qilinmagani eslatilgan.

Chunonchi, birlashmaning ko‘p qavatli ma’muriy binosi, ishlab chiqarish bazasi va dorixonalarining haqiqiy holati aniqlanmagani, ya’ni ular bozor narxida baholanmagani ta’kidlangan. Shuningdek, qonunga xilof ravishda davlat tasarrufidan chiqarilgan aksiyadorlik jamiyati rahbariyati ariza muallifining huquqlarini poymol qilayotgani qayd etilgan. Pirovardida ushbu holatlarni xolisona o‘rganib, mojaroni qonunan hal etish so‘ralgan.

Qashqadaryo viloyat iqtisodiy sudining tegishli instansiyasiga ro‘y bergan holat bo‘yicha tegishli qaror qabul qilishni so‘rab da’vo arizasi kiritildi. Aniqlangan holat bo‘yicha sud qarori chiqqach, unga muvofiq zarur chora-tadbirlar ko‘riladi.

Eslatib o‘tish joizki, davlat korxonasini davlat tasarrufidan chiqarish bilan bog‘liq hujjatlar haqiqiy emas deb topilganda, uning faoliyati to‘xtatilmaydi va ish o‘rinlari saqlab qolingan holda, xodimlar o‘z mehnat faoliyatini davom ettiradi.