Статистика: Туркманистонда қайси соҳа ходимлари юқори маош олади?

Orient нашри Туркманистон Давлат статистика қўмитасининг мамлакатдаги ойлик маошлар борасидаги маълумотларини ўрганиб чиқиб, қайси идора ва ташкилот ходимларига юқори маош тўланишини ҳисоблаб чиқди.

Аниқланишича, энг кўп маошни (ўртача) — савдо флотидагилар, хусусан, «Денгиз савдо флоти» ёпиқ акциядорлик жамияти ишчилар олишади. 2017 йилда уларнинг маоши 2,387,6 манатни (682 доллар) ташкил этган бўлиб, бу ўтган йилгига нисбатан бироз пастроқ кўрсатгич.

Ундан кейинги поғонани Туркманистон президенти қошидаги Миллий космик агентлиги эгаллади, ушбу ташкилот ходимлари ўртача 1 909,9 манат (546 доллар) маош олишади. Бу ўтган йилгига нисбатан 28,7 фоизга кўпроқ демакдир.

Учинчи ўринни «Туркманнефть» Давлат концерни 1861,4 манат (532 доллар) кўрсатгич билан банд этди.

Ундан кейинги ўринларга бутун молиявий-иқтисодий ва банк комплексларини қўйиш мумкин. Денгиз ва дарё транспорти давлат хизмати, Архитектура ва қурилиш вазирлиги, «Олтин аср» ёпиқ акциядорлик жамияти, «Туркмангеология» давлат корпорацияси каби ташкилотларда ҳам тўланадиган маош нисбатан юқори.

Шунингдек, юқори маош оладиган давлат идоралари орасига Таълим вазирлигини ҳам қўшиш мумкин.

Энг кам маошни Савдо ва ташқи иқтисодий алоқалар вазирлиги ходимлари олиши маълум бўлди.