Сурхондарё вилояти Шўрчи туманидаги «Жарқишлоқ» шаҳарча фуқаролар йиғинида яшовчи 14 ёшли бола Nexia автомашинасини ўғирлаб қочган ва далилий ашё билан қўлга тушган. Бу ҳақда ЎзА хабар берди.
Шўрчи туманида истиқомат қилувчи фуқаро М.Ф. соат 13:30 да ўзига тегишли Nexia русумли автомашинани Денов туманидаги кўчага қўйиб, пульт орқали қулфлайди. Ўт олдириш калитини жойида қолдириб, юмушларини бажаришга кетади.
Соат 16:00 да қайтиб келганида, машина жойида бўлмаган. Фуқаро бу ҳақда зудлик билан Денов тумани ИИБ навбатчилик қисмига хабар берган. Кўрилган тезкор чора-тадбирлар натижасида автомашинани бошқарган шўрчилик мактаб ўқувчиси Ж.М. ўртоқлари билан «сайр» қилиб юргани аниқланди.
Олиб қочилган машина ички ишлар органи ходимлари томонидан «Жарқишлоқ» шаҳарча фуқаролар йиғини ҳудудида тўхтатилгач, боланинг отаси автоуловнинг олиб қочилишига ўғлининг алоқаси йўқлигини исботлашга уринган. Лекин ички ишлар ходимлари бунинг аксини исботлади.
Ушбу ҳолат юзасидан Ўзбекистон Республикаси Жиноят Кодексининг тегишли моддаси билан жиноят иши қўзғатилиб, Nexia қонуний эгасига қайтарилди.
Изоҳ (0)