ЎзМТРК телеканалларидаги баъзи ток-шоуларнинг жонли эфирдаги намойишлари келаси ҳафтадан қайта тикланиши кутилмоқда. Бу ҳақда «Дарё»нинг ЎзМТРКдаги манбалари маълум қилди.
Қуддус Аъзам муаллифлигидаги «Муносабат» кўрсатуви келаси ҳафтадан жонли эфирда намойиш этилади. Мазкур кўрсатувнинг жонли эфирдаги намойишлари август ойи охирида — эфир жадвали байрам дастурлари билан тўлгани муносабати билан тўхтатилган эди.
«Ўзбекистон» телеканалидаги бошқа бир оммабоп ток-шоу — «Биз учун муҳим» ҳам яқин вақт ичида жонли эфирга қайтиши кутилмоқда. Журналист Барчиной Жўраева муаллифлигидаги кўрсатув ҳам август ойи охирида жонли эфирдан олинган эди.
Халқаро пресс-клуб анжуманларининг жонли эфирга қайтиш-қайтмаслиги ҳозирча номаълум. ХПК раиси Шерзодхон Қудратхўжаевнинг «Дарё»га маълум қилишича, ҳозирча пресс-клуб анжуманларининг жонли эфирга қайтиш борасида гап-сўз йўқ.
ЎзМТРК телеканалларидаги оммабоп ток-шоуларнинг жонли эфирдаги намойишларини вақтинча тўхтатиб туриш ҳақидаги қарор телевидениеда 21 август куни Ўзбекистон бош вазири Абдулла Арипов ва Президент давлат маслаҳатчиси Хайриддин Султонов раҳбарлигидаги мажлисда қабул қилинган эди.
Шу йиғилишда Хайрулла Нуриддинов уч кунлик танаффусдан сўнг ЎзМТРК раиси биринчи ўринбосари лавозимига қайта тайинланган, «Ўзбекистон 24» телеканали раҳбари Озод Ҳамидхўжаев вазифасидан озод этилган эди.
Изоҳ (0)