Бангкокдан қайтаётган рейс ушланиб қолди. «Ўзбекистон ҳаво йўллари» узр сўради

«Ўзбекистон ҳаво йўллари» миллий авиакомпанияси 5 сентябрдан буён техник сабабларга кўра ушланиб қолган HY532 «Бангкок–Тошкент» рейси йўловчиларидан узр сўради. Бу ҳақда «Газета.uz» хабар бермоқда.

216 йўловчиси бор самолёт Таиланд пойтахтидан техник носозлик туфайли учиб чиқа олмади.

«Рейс ҳаво кемасидаги носозлик бутунлай бартараф қилинмагунига қадар амалга оширилмайди», — дейилади расмий хабарномада.

Авиакомпания вакиллари муаммони ҳал қилиш учун тезкор чоралар кўрмоқда. Барча йўловчиларга меҳмонхона (ичида уч марталик тановул билан), аэропорт ва меҳмонхона орасида қатнаш учун транспортировка, шунингдек, халқаро алоқа орқали яқинлари билан боғланиш имконияти тақдим этилди.

Тошкент орқали Бишкек, Бишкек, Тель-Авив ва Россия шаҳарларига учаётган 90 кишига муқобил йўналишлар таклиф этилди. 8 сентябрь куни Тошкентга Куала-Лумпур рейсини қайта йўналтириш ҳисобига 90 дан ортиқ йўловчини олиб кетиш имконияти туғилди. Қолган 30 кишини Ўзбекистонга етказишнинг муқобил йўналишлари кўриб чиқилмоқда.

«Авиакомпания раҳбарияти номидан сизларга воқеа юзасидан узр айтишга рухсат беринг», — дейилади авиакомпаниянинг расмий хабарномасида.