Швецияда Стокгольм халқаро сув институти (SIWI) томонидан ташкил этилган Жаҳон сув ҳафталиги якунланди. Бу ҳақда «Дарё»га Марказий Осиё минтақавий экологик марказининг Ўзбекистондаги ваколатхонаси маълум қилди.
Сувдан қайта фойдаланиш, чиқинди ва оқава сувларни утилизация қилиш мавзусига бағишланган форумда Олий Мажлис Қонунчилик палатаси спикери ўринбосари Борий Алихонов бошчилигидаги Ўзбекистон делегацияси ҳам иштирок этди.
Ҳафталик доирасида Марказий Осиё вакиллари билан 3 та алоҳида тадбир ўтказилди. Улардан биринчисида қатнашчилар сув дипломатиясига эришиш йўлларини муҳокама қилди. Иккинчисида маҳаллий жамоаларни сув ресурсларини бошқаришга жалб этиш, учинчисида эса минтақа академик ҳамжамиятининг глобал барқарор ривожланиш жараёнидаги иштироки муҳокама этилди.
«Марказий Осиёнинг барча давлатлари билан умумий чегараларга эга бўлган Ўзбекистон минтақанинг барқарорлик, ривожланиш ва яхши қўшничилик ҳудудига айланишидан манфаатдор. Биз муроса асосида амалий мулоқотга ва энг долзарб муаммолар ечимини излашга тайёрмиз. Олдимизда турган муҳим вазифа — Орол инқирозининг атроф-муҳит ва Оролбўйида яшовчи миллионлаб кишилар ҳаёт тарзига салбий таъсирини камайтиришдан иборат», — деди Борий Алихонов Стокгольмда трансчегаравий ҳамкорлик ва сув дипломатиясига бағишланган семинардаги чиқиши чоғидада.
Борий Алихоновга кўра, ҳозирда Ўзбекистон минтақавий экологик маркази билан ҳамкорликда 2018 йили Тошкентда Марказий Осиё экологик форумини ўтказишга тайёргарлик кўрмоқда.
Изоҳ (0)