Ўзбекистонда 7 ой мобайнида қаровсиз ва назоратсиз қолган 6 минг нафар вояга етмаган аниқланди 

Ўзбекистон ИИВ Ҳуқуқбузарликлар профилактикаси бош бошқармаси томонидан «Ҳуқуқбузарликлар профилактикаси: устувор вазифалар ижроси» мавзусида матбуот анжумани ўтказилди. Бу ҳақда «Дарё»га бошқарма мутасаддилари маълум қилди.

Матбуот анжуманида қайд этилишича, республикада ўтган 7 ой мобайнида қаровсиз ва назоратсиз қолган 6 минг вояга етмаган аниқланди ва ижтимоий-ҳуқуқий ёрдам кўрсатиш марказларига жойлаштирилди. Уларнинг 3,5 минг нафари, ёки сал кам 60 фоизи Тошкент шаҳрида аниқланган. Бу болаларнинг аксарияти Қашқадарё, Сурхондарё, Самарқанд, Жиззах, Андижон ва Наманган вилоятларига тўғри келмоқда.

Вояга етмаган болаларини тарбиялаш борасидаги мажбуриятларини бажармаган 20 мингдан ортиқ ота-онага маъмурий жазо қўлланди, 30 нафари ота-оналик ҳуқуқидан маҳрум қилинди, 10 нафарининг муомала лаёқати чекланди.

Тадбирда якка тартибда профилактик ишлар олиб борилиши лозим бўлган ёшлар асосан ички ишлар идоралари ташаббуси билан рўйхатга олинаётгани, аксарият таълим муассасаларида бу ҳолат салбий кўрсаткич сифатида қаратилиб, тарбияси оғир, ҳуқуқбузарлик содир этишга мойил ўқувчилар тўғрисида ички ишлар органларига ўз вақтида расмий хабар берилмаётганига эътибор қаратилди.

Ўқитувчилар томонидан дарсга қатнашмаган ўқувчилар тўғрисидаги маълумотларни яшириш, атайлаб нотўғри кўрсатиш, синф журналларига дарсга келмаган ўқувчиларни машғулотларга қатнашаётганлиги тўғрисида белги қўйиш ёки бошқа сабаблар билан ўқувчиларнинг машғулотларга қатнашмасдан юришига шароит яратиб бериш ҳолатлари аниқланган тақдирда вояга етмаганлар ишлари бўйича идоралараро комиссияларда муҳокама килиниб, тегишли таъсир чоралари қўлланиши билдирилди.

Бошқармага кўра, Фарғона вилоятида қўлланилган тажрибадан келиб чиқиб, Республика ҳудудида маҳаллалар кесимида вояга етмаганлар ва ёшлар тўғрисидаги маълумотлар базаси шакллантирилмоқда. Бунда вояга етмаганлар ва ёшлар светофорнинг уч чироғи сингари уч тоифа, яъни қизил — жиноят содир этганлар, сариқ—ҳуқуқбурзаликлар содир этишга мойил бўлган, ўқимасдан, ишламасдан, қаровсиз ва назоратсиз юрганлар ҳамда яшил—намунали тарбияга эга бўлганлар тоифаларига ажратилади. Ҳар бир тоифа билан аниқ мақсадли тадбирлар амалга оширилади.