Бугун, 31 август куни «Шаҳидлар хотираси» ёдгорлик мажмуида Қатағон қурбонлари куни муносабати билан мазкур хиёбонда ўзбек халқининг озодлиги ва мустақиллиги йўлида қурбон бўлган марҳумларни ёд этиш маросими ўтказилди. Маросимда Ўзбекистон Республикаси Президенти Шавкат Мирзиёев иштирок этди, деб хабар берди ЎзА.
Анъанага кўра ош тортилди. Қуръон тиловат қилиниб, қатағон қурбонлари руҳига ҳурмат бажо келтирилди.
Шавкат Мирзиёев Ўзбекистон мусулмонлари идораси раҳбарияти, уламолар, маҳалла фаоллари ва зиёлилар билан суҳбатлашди.
Ислом Каримовнинг 2001 йил 1 майдаги «Қатағон қурбонларини ёд этиш кунини белгилаш тўғрисида»ги фармони асосида «Шаҳидлар хотираси» ёдгорлик мажмуида «Қатағон қурбонлари хотираси» музейи барпо этилган эди.
Музей 2002 йил 31 август куни – мамлакатда илк бор нишонланган Қатағон қурбонларини ёд этиш кунида тантанали равишда очилган.
Ўзбекистон Президенти Шавкат Мирзиёев музей экспонатлари билан танишди.
«Аждодларимизнинг Ватан тинчлиги ва озодлиги йўлидаги кураши бугунги кун ёшлари учун ибрат мактабидир... Ҳар бир вилоятда Қатағон қурбонлари хотираси музейининг филиалларини ташкил қилишимиз керак. Улар университет ва институтлар қошида ташкил этилса, айни муддао бўлади. Қатағон қурбонлари хотираси бўйича мактаб дарсликларида махсус дастур асосида ўқитиш тизимини ҳам ишлаб чиқиш зарур», — деди мамлакат раҳбари.
Шавкат Мирзиёев музей ёнидан оқиб ўтувчи Бўзсув канали атрофини янада ободонлаштириш бўйича мутасаддиларга кўрсатмалар берди.
«Бу ердаги муҳит ижодкорлар учун илҳом манбаидир. Шунинг учун Бўзсув канали атрофида турли тадбирлар – мақом кечалари, ёшлар, нуронийлар ва зиёлиларнинг учрашувларини уюштириш мақсадга мувофиқ», — деди Президент.
Изоҳ (0)